Kleppa seier nei til vestlandsregion

Rogaland er i samtalar med Hordaland og Sogn og Fjordane om å lage ein stor vestlandsregion. Det er ikkje den beste ideen for Rogaland, meiner fylkesmann Kleppa, som fredag la fram sitt høyringsfråsegn i saka.

“Valet står mellom ein stor vestlandsregion eller Rogaland åleine, eventuelt utvida som Sør-Vest politidistrikt. (…) Fylkesmannen meiner at særleg behovet for tett kontakt med kommunane, god lokalkunnskap, samarbeids- og samordningsbehov tilseier at Rogaland bør halda fram som eigen region – med grenser tilsvarande Sør-Vest politidiskrikt som det aller beste alternativet”, skriv fylkesmannen, og kjem til konklusjonen at regionen vert for stor.

“Det viktigaste er nærleik til kommunar og andre brukarar. Avstandane i ein stor Vestlandsregion blir store. Det er korkje rasjonelt eller effektivt å bruka tid og ressursar på å reisa rundt i regionen, korkje for politikarar eller administrasjon. Digitaliserte løysingar kan heller ikkje alltid erstatta personleg frammøte og/eller synfaringar”, meiner Kleppa.

Fylkesmannen er samd med tilhengjarane av ein vestlandsregion i at felles grense med fleire statlege etatar, samordna planarbeid og stordriftsfordelar er argument for å samle dei tre fylka i ein region, men at det i arbeidet med regionen er lagt for lite vekt på argumenta som går i mot ein slik samanslåing.

Kleppa er kritisk til at forhandlingane om ny region har inkludert korleis Fylkesmannen skal organiserast.

“Me undrar oss over at Fylkesmannen si organisering har vore eit forhandlingstema i arbeidet med intensjonsplanen. Fylkesmannen er heilt avhengig av nærleik til kommunane og andre brukargrupper. Det er derfor særs viktig og avgjerande for oppgåveløysinga korleis strukturen er og kvar embetet er lokalisert”, heiter det i fråsegna frå fylkesmannen.