Folkebiblioteka bidrar til beredskapen

Kampen mot desinformasjon er ein viktig del av forsvaret av Noreg, og regjeringa skal til våren legge fram ein strategi for å styrke motstandskrafta mot denne. Samtidig understrekar totalberedskapsmeldinga viktigheita av å bygge eit samfunn som er motstandsdyktig mot påverknad.

Som kommunale biblioteksjefar er vi opptatt av å vise at biblioteka har ein høgst naturleg plass i denne strategien.

Vi har ultraprosessert mat, og vi har ultraprosesserte medium. Stadig får vi i oss ferdigtogge innhald som blir svelgt utan kritisk refleksjon, og vi blir utsett for falske nyheiter og konspirasjonsteoriar.

Heile 95 prosent av ungdommane konsumerer nyheiter, men det er problematisk at det i lita grad er frå redaktørstyrte medium.

Det er tydeleg at vi ikkje kan overlate ansvaret for å halde oss informert til Google eller ChatGPT, like lite som vi kan overlate ansvaret for ein open og opplyst debatt til X eller TikTok.

Det verkar kanskje håplaust. For når alle fakta kan avfeiast som løgn, blir alt sett i spel, og løgnaren får stor makt. Å vere kjeldekritisk er viktig, men det kan ikkje stoppe der. Vi må også halde fast ved at det finst pålitelege kjelder, ein må berre vite korleis dei kan kvalitetssikrast. Og hjelpa finst 641 stadar over heile landet: på folkebiblioteket.

I tillegg til å finne skjønnlitteratur kan du også finne fakta og vurdere kjelder på biblioteket.

La oss ta nokre eksempel. Det er stor konflikt i lokalsamfunnet om det skal bli oppretta eit nytt datalagringssenter eller ikkje, og du er usikker på kva dette vil bety.

Eller du ser eit overraskande bilde på nett: Er det ekte, eller er det laga av kunstig intelligens? Og kva viss tenåringsdottera di vil begynne med produkt mot aldring fordi påverkarar på TikTok sver til det?

Jo, då kan du komme til ditt lokale folkebibliotek for hjelp. Der kan fagfolk vise korleis du kan faktasjekke slike påstandar. Kanskje dei til og med skal arrangere eit opent dialogmøte om datalagringssenteret, ein KI-workshop eller ungdomsmøte med helsesjukepleiar?

Biblioteket sitt samfunnsoppdrag er å bidra til kritisk tenking og digital dømmekraft i befolkninga. Det passar særdeles godt med regjeringa sitt arbeid for å styrke befolkninga si evne til kjeldekritikk og i kampen mot desinformasjon.

Biblioteka gir tilgang til kunnskapsdatabasar og redaktørstyrte medium, dei er bemanna med kompetanse på søk og kjeldekritikk, er gratis og opne for alle og finst i kvar einaste kommune. Biblioteket er rett og slett laga for å bygge opp under eit opplyst og demokratisk samfunn.

Rapporten Kunstig intelligens og demokratiske valg — internasjonale erfaringer og nasjonale anbefalinger trekker fram kjeldebevisstheit som eit av ni tiltak for å styrke demokratiet og tilliten til norske val. Da burde det vel vere ei sjølvsagt løysing å ta i bruk denne eksisterande, landsdekkande og kunnskapsrike infrastrukturen?