Annonse
Nyheter
Elfly kan revolusjonere Vestland, meiner fylkeskommunen
Meir pengar og sterkare vilje må til for å få til revolusjon i lufta, syner ny rapport. Men for å få elektriske fly på vengene, må det meir politiske vilje til, pengar og klårare mål.
Eit elfly mellom Førde og Bergen er mogleg å få i lufta, men då må det sterkare politisk vilje til og pengar på bordet. Dette syner ein rapport som Transportøkonomisk Institutt (TØI) står bak, på oppdrag frå Vestland fylkeskommune.
Rapporten peikar på ulike økonomiske verkemiddel som kan bidra til å nå måla i den nasjonale luftfartsstrategien, Bærekraft og sikker luftfart.
Det må blant anna bli fritak for start- og landingsavgift, passasjeravgift og moms. Det må også øyremerka middel til for å etablere ladeinfrastruktur.
Rapporten peikar også på politisk vilje.
– Politikarane samla seg rundt ein insentivdreven elbilpolitikk. Dette må også etablerast skal ein få elfly inn i på ordinære passasjerruter, meiner seniorforskar ved TØI, Inga Margrete Ydersbond.
– Ein revolusjon
I fjor vedtok Vestland fylkeskommune å samarbeide med Sunnfjord kommune og Sunnfjord Utvikling AS om etablere ei pilotrute mellom byane.
Flytilbodet mellom dei to vestlandsbyane Bergen og Førde vart borte i 2020. Denne ruta var ei av dei 21 FOT-rutene i landet.
FOT-rute er ei ordning der staten sponsar flyruter der det ikkje er kommersielt lønnsamt å fly.
I luftfartsstrategien står det at dei første elflya skal fasast inn på FOT-rutene med oppstart i 2028-2029, men det er ingen konkrete nasjonale mål om når nasjonal luftfart skal operere med nullutslepp.
– Klare, tallfesta og tidsdefinerte målsettingar er viktige som motivasjon og tryggleik for at flyselskap, teknologiselskap og investorar held fram med å utvikle teknologi for nullutslepps luftfart, meiner Ydersbond.
Fylkesvaraordførar Natalie Golis trur elflysatsinga vil påverke både busetnad og verdiskaping i regionen i tillegg til å kutte klimagassutsleppa.
– Elfly vil bli Vestlandets intercity. Dette vil bli ein revolusjon, ikkje berre for bulyst og verdiskaping i regionen, men ein slik pilot bidrar til teknologiutvikling og viser at også luftfart evnar å kutte klimagassutslepp, seier Golis på Vestland fylkeskommune sine nettsider.
